الغرام في الدم سارح
والهوى طارح معزه
والحنين للقرب بارح
والنوى جارح ياعزه
ياابتسامه فجر هله
بددت ليلي الحزين
ياندى الصبح اللي شقشق
فوق خدودي الذبلانين
بل شوقهم
صحى لون الورد فوقهم
كل خد وشم له ورده
مين يذوقهم
غيرك انتي
ومين سواكي
ياحياتي ياملاكي
يانسيم الحب لما هب
هز القلب هزه
ياهوى الاحلام ياعزه
-------------
اليوم ياملاكي
جم خذوني جوز تنابله
ونص دسته من الثيران
كنت بحلم ياحبيبتي
كنت بحلم بيكي انتي
قال انا وانتي قال
في جنينه خضرا
محاوطها البرتقال
والسيسبان
وانتي جوا قرنفلايه
بالعبير بتستحمي
اجري يمك ياهوايا
وتسبقيني
تجري يمي
واحضنك
واشرب عبيرك
من شفايفك
والغصون واقفه شايفه
تراعينا بس خايفه
من العيون
والعيون تقول كلام
والكلام طاير حمام
بينادينا بالاغاني
ويهادينا بالسلام
كنت بحلم ياحبيبتي
كنت بحلم بيكي انتي
ايوة انتي ومين سواكي
ياملاكي ياحياتي
يانسيم الحب لما هب
هز القلب هزه
ياهوى الاحلام ياعزه
----------
واطلق في الجو فجاه
ياحبيبتي صوت مفاجئه
صوت يخلي الدم يجمد
اصحى ياحمد
اصحى ياحمد
وانتهى الحلم الجميل
وابتدى الهم الثقيل
فين امام
انتو مين
احنا ناس مكلفين
تيجي تسال مش حتتعب
واحنا طبعا معذورين
انتو دود الارض
والافه المخيفه
وانتو ذره رملفي عيون الخليفه
انتو كرباج المظالم والماسي
انتو عله بجسم بلدي
انتو جيفه
-
سكتووه ابن الكلاب
سففوه بالتراب
فتشوا كل الاماكن
طلعوا رفوف الدولاب
كمموني ياحبيبتي
كتفوني ياحبيبتي
قوموني
قعدوني
كل شعره بجسمي
بالعين فتشوها
حتى المخده
من جنانهم شرحوها
وانتهى التفتيش
مفيش
صدقيني متخفيش
هو في عندي ياعزه ممنوعات
غير بحب الناس وبكره السكات
-------
بص واحد من التنابله
جوه عيني
وانتي عارفه
عنيا صافيه وطيبين
زي كل عيون بلدنا
شباك ع القلب
دغري موصليين
كان مناه يلمح
علامه خوف بسيطه
طب حيجي الخوف منين
ابن العبيطه
هو مين فينا الجبان
ولامين فينا اللي خان
اللي قلبه بالمحبه والاماني
والربيع الاخضر مزهر
والاغاني
ولاكلب الصيد واسياده الاباطره
اكالين لحم البشر
فوق الصواني
وهومين فينا الجبان
ولامين فينا اللي خان
هو بص في عيني بصه
وارتجف وفحلقه غصه
واتعوج ومال وقال
جملتين مش مفهومين
اصله شاف
صورتيين جمال
في العيون الطيبيين
مصر في العين الشمال
وانتي في العين اليمين
---------------

طرح اكثر من رائع مشكووور اخي
بس مانت ملاحظ انك معجب بالشعر المصري
هههههههههههه